Umufana ukomeye w’Ikipe ya Mukura Victory Sport et Loisir n’Ikipe y’Igihugu ‘Amavubi’, Mukanemeye Madeleine, wamenyekanye nka “Mama Mukura”, ararembye ndetse yimuriwe mu Bitaro bya Kaminuza bya Butare (CHUB).
Ku wa Kabiri, ni bwo IGIHE dukesha iyi nkuru yanditse ko uyu mukecuru w’imyaka 103 arwariye mu Bitaro bya Kabutare byo mu Karere ka Huye.
Ku gicamunsi cyo kuri uyu wa Gatatu, Ikipe ya Mukura Victory Sports yatangaje ko kuri ubu Mukanemeye arembye ndetse yahinduriwe ibitaro.
Iti “Mukanemeye Madeleine (Mama Mukura) ararembye. Yari arwariye mu Bitaro bya Kabutare ariko yoherejwe mu Bitaro bya Kaminuza bya Butare (CHUB).”
Yakomeje igira iti “Ubu uyu Mubyeyi arwariye mu ndembe. Abaganga bari gukora ibishoboka byose ngo amere neza. Dukomeze tumusengere kandi tumube hafi.”
Mukanemeye Madeleine w’imyaka 103 y’amavuko, wo mu Murenge wa Save i Gisagara, asanzwe ari umufana ukomeye w’Ikipe y’Umupira w’Amaguru ya Mukura VS ku buryo adashobora gusiba umukino wayo.
Mu 1922 ni bwo Mukanemeye yaboneye izuba mu Mudugudu wa Kabitoki mu Kagari ka Munazi mu Murenge wa Save ho mu Karere ka Gisagara; ni umuhererezi mu bana umunani bavukana.
Yize amashuri abanza hafi y’iwabo ariko ageze mu mwaka wa gatatu arayacikiriza ajya gukora akazi ko gutekera ababikira i Kibeho mu Karere ka Nyaruguru.
Mu 1965 ni bwo yashatse umugabo afite imyaka 43 y’amavuko ariko nta mwana babyaranye. Mu 2022, Mukanemeye yabwiye Igihe ko yatangiye gukunda umupira w’amaguru akiri muto yiga mu mashuri abanza ndetse akagerageza no kuwukina.
Yagiye akunda kujya kureba umupira w’amaguru aho abahungu bari gukinira karere rimwe na rimwe na we agakinana na bo. Ubwo yari inkumi yagiye kureba imikino y’umupira w’amaguru yitabiriwe n’Umwami Mutara III Rudahigwa.
Mu 1963 ubwo Mukura VS yashingwaga yamenye ayo makuru atangira no kujya ajya kureba imikino yayo yisanga ari umukunzi n’umufana wayo kugeza n’ubu.
Mukanemeye w’imyaka 103 avuga ko ubusanzwe ikipe afana kandi akunda ari Mukura VS ariko akunze no gukurikira amakuru y’Ikipe y’Igihugu ‘Amavubi’ binyuze kuri radiyo.
