Ku wa kabiri tariki ya mbere Gashyantare ni bwo ikipe ya Mukura Victory Sports yo mu karere ka Huye yatsinze ikipe y’Ingabo z’Igihugu APR FC igitego kimwe ku busa mu gihe yari imaze imikino igera kuri 50 idatsindirwa ku butaka bw’u Rwanda.
Byasabye amezi abiri atandukanye (Mutarama na Gashyantare) n’iminsi ibiri itandukanye ngo Mukura Victory Sports yizere guhigura umuhigo wo guhagarika APR FC wari warananiye andi makipe kuko umukino watangiye tariki ya 31 Mutarama ukaza gusubikwa kubera imvura nyinshi ugakinwa ku munsi ukurikiyeho tariki ya 1 Gashyantare 2022.
APR FC kuri ubu iri ku mwanya wa 21 ku Isi ikaba irusha umukino umwe Arsenal yatsinze imikino 49 ya shampiyona yikurikiranya hagati ya 2003 na 2004.
Ikipe kuri ubu ku Isi ifite umuhigo wo kumara imikino myinshi ya shampiyona yikurikiranya idatsindwa ni ASEC Mimosa yo muri Côte d’Ivoire yatsinze yageze ku mikino 108 hagati y’umwaka ya 1989 na 1994. Iyi kipe irarusha imikino ine Steaua Bucuresti yo muri Romania yamaze imikino 104 yikurikiranya idatsindwa, hagati ya Kamena Kamena 1986 na Nzeri 1989.
Ikipe ya gatatu ku Isi ifite umuhigo wo kumara imikino myinshi ya shampiyona yikurikiranya idatsindwa ni Lincoln Red Imps FC yo muri Gibraltar yabikoze hagati ya 2009 na 2014.
Esperance Sportive de Tunis yo muri Tunisia yo yamaze imikino 85 ya shampiyona idatsindwa hagati ya 1997 na 2000, Al Ahly yo mu Misiri imara 71 hagati ya 2004 na 2007 mu gihe AC Milan yo mu Butaliyani yo yamaze 58 hagati ya 1991 na 1993.
